عنتر هلال يكتب : عنتر …هلال مع الصليب

0 10
أنا مكسوف من نفسى
من.. وليم ..صاحبى
من إنتيمة بنتى اللى إسمها .. مريان
م الغل اللى شهدناه
و الشارع اللى انا ساكن فيه
من ماضى بننفيه
من مستقبل لسه بيحبى
عريان
سيبناه
بعد ما شوهناه
ليل و نهار بالعار مكسى
و أنا واقف مكسوف من نفسى
…………..
جارى اللى الحيط فى الحيط
و آدم …دم و خيط
بيلضمنا ببعض
و العمر خليط
من هوا .. مع سما.. على أرض
مابيكلمنيش!!!؟
لا بيرد سلامى!!!؟
و بينده اطفاله الجايين قدامى
ما بيأمن ليش
يا وطن احنا فيه
مجرد ضيوف
اعمل معروف
جارى اللى رد إزاز مع شيش
حزن و خوف
و طفا النور معذور
الوحش اللى من الشاشه 
طلقناه
على خلق الله
أنا و انت و هى و هو 
أول ضحياه
آه يا طيبه 
و قلبك مكسور
يا مركبه و أمتى هترسى
لسه أنا واقف مكسوف من نفسى……(عنتر هلال)
%d مدونون معجبون بهذه: