عبده الزرّاع يكتب : فارس الشعر والمغنى.. (إلى روح الشاعر طاهر البرنبالى)

0 70

يا طاهر القلب يا برنبالى..
قلبك كان طير حرير بيوشوش النجمات..
ويرشرش الأمنيات على ضحكه ربانى
وأنت الأمانى بتترسم على جبهتك برواز
و”الطيارات بتغز تحت الباط”
“كاذذ عليك العياط”.. يا ابن الوطن والندى والضحك والأحلام

Image result for عبده الزراع
عبده الزراع


باصص بعينك ع المدى..
وما كنت تعشق غير نهار
وف طلة النوار.. تتهجى لون الخضار نعناعى
رايح على “برنبال” تحضن عيونك غيطان
وبين صحابك تغنى أجمل الأشعار..
من “نجمة الضهرية..
لطالعين لوش النشيد..
لطفله بتحبى تحت سقف الروح..
لطارت مناديل السعاده”
دمك.. سكر زياده يا صاحبى
وضحكتك شربات..
وبتنطلق من شرقها لغربها..
عصفور وعاشق للغنا والزقزقه
عارف دروبها وشمسها.. ساكن قمرها وضيها
وف نن عينك بتحفظ سكك الشوارع والبيوت..
والتوت يراهن قطف ايدك م الفروع
عاشق طلوع الشجر والنخل..
وصيد النحل والدبابير
ورسمت حلمك ع الورق طيايير
طالعه البنات امامير على “ترعة الراحة”
بتغنى للقمر السارح.. وتغازل الشبان
طرح الشبك بيصيد م البحر جنية
“يا بحر مين سماك” بالقلب بالنية
“مرجح خيوط الشبك”.. طاير حمام غيه
حافظين غناك يا طاهر فى “حياة الجوهرى”
و”أحزان مريم” بتطبطب ع القلوب ف الليل
و”امبارح كان” الغنا أجمل..
وصوت “حنان ماضى” بيرطب الوجدان
“كان فى الامكان” تعدى من كل المحن..
لكن النصيب بيصيب وتخش ف المحظور
وتعيش تعانى يا صاحبى م المرض والزور
وتخش فى “طريق مفتوح فى ليل أعمى”..
بيصفى ضى الروح وينشف الأبدان
و”طرطشات الذات” تبات حيرانه فى المعنى
وانت فارس الشعر والمغنى..
والكلمه أقوى م الرصاص .. بتصيب ف القلب وتعلم

Image result for طاهر البرنبالي
طاهر البرنبالى


عايش يا طاهر بحرفك رغم قصر العمر
وقطر عمرك يا صاحبى كان سريع بيمر..
سلم لى على كل الصحاب الشعرا يا شاعر
وأحضن لى “عبد الدايم”..
وبوس خدود “الجابرى”
وقول “لعبد المعطى” ضحكتك بترن ف ودانى
و”خالد عبد المنعم” أبو شعر وجدانى
وعم “تاج الدين”..
وقول لهم إحنا أكيد جايين
جايين يا طاهر.. ساعة قطرنا ما يقوم
جايين يا صاحبى كلنا بالدور
انتوا الحقيقة..
وحياتناهى الزور.

الشيخ زايد فى 6 مارس 2017

%d مدونون معجبون بهذه: