د.أحمد صلاح كامل يكتب : الخطة الجهنمية للوصول للنجومية فى شعر العامية !!

0 54

وأنا ح اختصر لك الموضوع أي ندوة تقرر تروحها خد معاك واحد صاحبك مالوش في الشعر خالص ظبطه ع القهوة واشتري له تمنين لب وعلبة سجاير وحفظه يسقف لك امتى وفين ولازم يعلي صوته وهو بيقولك ( الله عليك يا نجم ) ، لما ينادوا اسمك ما تتسربعش امشي بثقه وأنت بتبص على كل الحضور في القاعة ، مهم أوي توزع ابتساماتك الساذجه على الجميع ، ولما تقف ع المنصة اشكر المنصة على إلحاحها الشديد عليك إنك لازم تقول شعر الليلة برغم إنك ما كنتش عامل حسابك ، بص لأي حد في القاعة وكأنك تعرفه ومسي عليه ( مساء الفل ياعم عاطف .. حبيبي والله .. عارف إنك جاي م المرج مخصوص عشاني ) وابدأ بنفس عميق وطلعه وأنت بتبص لفوق .. مهم أوي تبص لفوق عشان تدي انطباع إن الوحي ح ينزل عليك ، استجمع قوتك وخشن صوتك وبص للمنصه ، وادهشهم بجملة البداية : _
فدان هبل
وعودين قصب
وسبوع حسين
ناقص يومين
والليل عجوز
من غير عنين
كده أنت عملت ذهول وادهاش كبير ، أكيد مع نبرة صوتك الخشنة الواثقة كلهم ح يتأكدوا انهم أمام شاعر كبير ممكن ما يكونوش فاهمين قصدك إيه لكنهم متأكدين أنك عميق وأكبر من أفهامهم ، ما تخلهمش يفكروا كتير دوس واطرح أسئلتك الكونية المعقدة.. ما تنتظرش ..خش في الهم :_
ليه كل ما أشرب شاي
يقلب جنزبيل ؟
ليه الحمار ف عنيَّا فيل ؟
ليه الدليل ما بقاش دليل ؟
ليه الأصيل ما بقاش أصيل ؟
ليه العويل ما بقاش عويل ؟
والليل بيعلن إنه أصبح مستطيل
وأنا منحرف أضلاع يا نيل
كده كلهم ح يفتحوا بقهم ويسمروا عيونهم عليك ، انتهز الفرصة مع آهات صاحبك اللي عمال يقول لك ( الله عليك يا نجم ) ، اتحرك باتجاه الناس وركز في عيونهم أوي وكأنك بتكلمهم ، وكمل بأسئلة تستميل تعاطفهم معاك :_
هو أنتو فاكرين انو نيل
يا نهار طويل
دا شربكو من أيام قبيل
واحتسنا ف الليل الطويل
هو أنتو فاكرين انو نيل
حاول بقى تقفل بصدمة كبيرة وأنت بتعلى بنبرة صوتك :_
أنتو اللي ربيتو الحمار على إنو فيل
وأنتو اللي غميتو النهار على إنو ليل
وزرعتوا فدان الهبل بالمستحيل
يا شعوب بتكره نفسها من غير دليل
ويا سلام لو قطعت الورقة اللي بتقرا منها وأنت بتغادر المنصة وصاحبك بيسقف بلا توقف ..كده يبقى مبروك عليك النجومية في شعر العامية ..

والله عليك يا نجم .

%d مدونون معجبون بهذه: