مسعود شومان : غنى وسقف لنفسك

0 133

غنى وسقف لنفسك
وحط إيدك فى إيدك
ها يحاوطوا بالجنازير
أغوات على مماليك على خنازير
ورقاصين قفوات
لو يزرعوا المسامير
اعمل عينيك كماشه
واوعى تقول للهلف يا باشا
أفهم قليبك لما يتنهد
واسمع لصوت الميه فى البراد
البوص ما يتعملش منه اوتاد
والنار وليفه وصافية فى المنقد
صب الوجع فى الكوبيات
واعرف مقام النسور
وما تشتريش النور
النور مالوش بياعين
النور بيتعرف من اسمه

(مقطع من ديوانى الجديد)

*********************

فى ذكرى العميد طه حسين
………………….
شوفت الملايكه بتقرا سورة ،،الرحمن،،
وتحفظك سرها والنور يخطى معاك
أقرأ الآيات بالنغم
وعدى الضلمه يا ،،طه،،
مشى ورجليه نور ع العتمه خطاها
قاعد بيشكى للسما
وعينيه بتبكى عتاب
والدمع بيجرجره من داره للكتاب
م المنيا داست خطوته ع المر للأزهر
قال المنايا عطايا والزمن ها يفوت
وشجرته طرحت كلام
بالمعجزات أزهر
قال الحياه ما بتنتهيش بالموت
اركب حصانك يا فتى
وقولها ،،كن فيكون،،
عرفوا مقام القمر
والنور وهب له عيون .
…………………………………………………….
مقطع من قصيدة طويلة بعنوان ،،طه حسين،،

**************

%d مدونون معجبون بهذه: